Laugargerðisskóli

Nýtt skólaár

Siggi — Thu, 12 Aug 2010 10:55:14 +0000

Ágætu íbúar Kolbeinsstaðahrepps og Eyja- og Miklaholtshrepps.

Laugargerðisskóli verður settur föstudaginn 20. ágúst klukkan 14:00

Nemendur munu hitta umsjónarkennara sinn og fá stundatöflur. Heitt verður á könnunni. Kennsla hefst svo mánudaginn23. ágúst. Líkt og undanfarin ár verður kennt fram að hádegi fyrstu dagana, þ.e. mánudaginn 23. og þriðjudaginn 24. ágúst.

Öll börn á skólaskyldualdri þurfa að vera skráð í skólann. Leikskóli verður starfandi líkt og síðasta ár. Þeir foreldrar sem ætla nýta sér leikskólann eru beðnir að hafa samband við Kristínu Björk skólastjóra í síma 4356601. Til að auðvelda foreldrum innkaup fylgir hér listi frá kennurum. Þetta er ekki innkaupalisti því flest af þessu gæti verið til frá í fyrra.

Fyrir íþróttir þarf stuttbuxur, stuttermabol, íþróttaskó, sundföt og sundgleraugu. Gera ráð fyrir útiíþróttum meðan veður leyfir í haust. Einnig ætlum að nota haustið sem mest til útikennslu/vinnu. Nemendur þurfa að reikna með útikennslu og útiveru næstu vikurnar.

Allir nemendur þurfa að hafa skriffæri, yddara, strokleður.

Að auki:

1.-4. bekkur: límstifti, tréliti og skæri. Teygjumöppu.

Nemendur í 5.-10. bekk þurfa teygjumöppu fyrir hvert bóklegt fag eða 1-2 harmonikumöppur.

5.-7. bekkur: Penni, límstifti, skæri, tvístrikaða stílabók (1 eða fleiri), reiknishefti og Skólakompu 3.

8.-10. bekkur: Lausblaðamappa, 2-4 A4 stílabækur, reikningshefti (ekki gormabækur), vasareiknir (hafa samráð við skóla), góður penni, orðabækur í ensku/dönsku æskilegar. Skóladagbók (þarf ekki að vera fullkomin því Mentor verður notaður v. heimavinnu og annars.)

Áður en keyptar verða stílabækur og reikningshefti er gott að athuga hvað til er frá í fyrra.

Æskilegt að sem flestir nemendur eigi inniskó í skólanum og ekki verra að útiföt séu vel merkt.

Starfsfólk Laugargerðisskóla

Gleðilegt sumar – Skólaslit

Siggi — Fri, 04 Jun 2010 11:15:21 +0000

Laugargerðisskóla var slitið föstudaginn 28, maí við hátíðlega athöfn. Skólaárið hefur verið farsælt og allir glaðir að halda út í sumarið. 7 nemendur útskrifuðust úr 10. bekk að þessu sinni og þrjú af þeim fengu verðlaun á skólaslitum. Kristín Perla Sigurbjörnsdóttir hlaut bókaverðlaun fyrir góða ástundun og góðan námsárangur. Aldís Sunna Jónsdóttir hlaut bókaverðlaun fyrir miklar framfarir í námi þetta skólaárið. Magnús Kristjánsson er íþróttamaður Laugargerðisskóla, en hann fær farandbikar og verðlaunapening. Íþróttakona ársins sem hlaut samskonar verðlaun er Valgerður Á Sigurðardóttir 8.bekk. Á miðstigi fékk Þórður Sigurðsson bókaverðlaun fyrir góða ástundun. Á yngsta stigi var sundmaður ársins Bjarki Ásbergsson sem fékk veðlaunapening fyrir miklar framfarir. Einnig fékk Hallbjörn Heiðar Sigurðsson bókaverðlaun fyrir miklar framfarir í lestri. (Myndir)

Síðasti kennarafundur var haldinn 1. Júní en þessa viku hafa kennarar og skólastjóri undirbúið kynningu á þróunarstarfinu Borgarfjarðarbrúin. Síðasti formlegi starfsdagurinn er 7. júní haldinn í Borgarnesi.

Þakka öllum nemendum, foreldrum og starfsfólki fyrir gott samstarf á þessu skólaári

Skólahald byrjar síðan aftur með starfsdögum kennara 16.ágúst og skólasetning verður föstudaginn 20.ágúst

Skólastjóri

Skólaferðalag

Siggi — Wed, 02 Jun 2010 09:53:41 +0000

Dagana 24. – 27. maí héldu 8.-10. bekkur í skólaferðalag.

Lagt var af stað frá Laugargerði kl. 16:00, mánudaginn 24. Leiðin lá til Þorlákshafnar til að ná Herjólfi, með einu sjoppustoppi í Reykjavík. Við fengum frábært veður og hreyfðist skipið lítið á leiðinni. Daginn eftir var farið í skoðunarferðir. Fyrir hádegi var sigling og fengum við smá bónus þar sem við rákumst á háhyrningavöðu. Seinni partinn var svo farið í rútuferð um Heimaey þar sem bílstjórinn sagði okkur ýmsar skemmtisögur. Einnig lentum við í öskubyl þegar gengið var á Eldfell. Frítímanum í Eyjum var eytt á ýmsa vegu: farið í sund, sprangað, eða bara röltað um bæinn.

Miðvikudagurinn var tekinn snemma. Farið á fætur upp úr 7 enda brottför með Herjólfi kl 8:15. Ekki var veðrið síðra núna og varla hreyfing á skipinu. Þegar komið var í land var haldið til Selfoss þar sem aðeins var verslað og síðan lá leiðin á Drumboddsstaði þar sem ætlunin var að fara í „rafting“ á Hvítá.

Við vorum hluti af 90 manna hóp og var siglt á 8 bátum. Óhætt er að segja að allir hafi skemmt sér konunglega þó misblaut höfum við verið að ferð lokinni. Eftir maganæringu var halið að Minniborgum þar sem síðustu nóttinni var eytt í sumarbústað. Eitthvað var hópurinn farinn að lýjast því þrátt fyrir að mega vaka síðustu nóttina voru allir sofnaðir fyrir miðja nótt.

Þar sem liðið vaknaði bara tiltölulega snemma á fimmtudeginum var bara drifið í að borða og þrífa og lagt af stað heim. Komið var við á Þingvöllum fyrir ís og síðan fóru nokkur í sund í Borgarnesi. Komið var á endastöð í Laugargerði um kl. 16:00 og tók því ferðin nákvæmlega 3 sólarhringa.

Ég vill þakka öllum krökkunum fyrir frábæra ferð og auðvitað voru allir stilltir og sjálfum sér og skólanum til sóma. Kærar þakkir líka til Huldu sem var bílstjórinn okkar á fastalandinu og kom auðvitað líka með til eyja. (Myndir)

Óvissuferð

Siggi — Mon, 24 May 2010 13:46:45 +0000

Föstudaginn 21. maí var farið í hina árlegu óvissuferð Laugargerðisskóla. Nemendur fá þessa ferð fyrir góða hegðun og ástundun. Að þessu sinni var haldið til Akraness, ferðin bæði námsferð og skemmtiferð fyrir nemendur frá 5.-10. bekk. Byrjað var á því að skoða Byggðasafnið að Görðum, þar var tekið á móti okkur með góðri leiðsögn. Skoðað var íþróttasafn Íslands, þar sem saga íþrótta og afreksmanna er rakin frá fyrstu tíð. Einnig voru skoðuð hús og munir frá fyrri tíð en byggðasafnið varðveitir heildstætt safn muna sem tilheyrðu fyrri tíðar búskaparháttum. Þar eru bílar, bátar, kútterar og fleira sem fróðlegt var að skoða. Nemendur voru fróðleiksfúsir, kurteisir og skólanum sínum til sóma. Eftir það var haldið í sundlaugina þar sem hægt var að leika sér í sól og blíðu. Enduðum heimsóknina á Galitó þar sem beið okkar gómsætt pizza-hlaðborð þar sem allir gátu borðað að vild. (Myndir)

Nú tekur við frí fram á föstudag fyrir nemendur 1.-7. bekk en 8.-10. bekkur heldur af stað í skólaferðalag í dag annan í hvítasunnu og koma heim á fimmtudag. Starfsdagar eru þriðjudag, miðvikudag og fimmtudag.

Skólaslit Laugargerðisskóla verða föstudaginn 28. maí kl. 14:00 allir velunnarar skólans eru velkomnir.

Lokadagur

Siggi — Mon, 24 May 2010 10:20:43 +0000

Fimmtudagurinn 20. maí var eiginlegur lokadagur hér í skólanum. Margt var þá til gamans gert t.d. gerðu krakkarnir á yngsta stiginu báta úr frauðplasti og fóru síðan í smá keppni í sundlauginni þar sem bátur Jónu Maríu bar sigur úr býtum. Krakkarnir á miðstiginu pökkuðu inn hráum eggjum sem síðan var kastað niður úr brunastiganum. Öll eggin komust heil til jarðar en fallegasta pakkningin var eftir þá Ársæl og Þórð Má. Nemendur á elsta stiginu kepptu síðan í „skúlptúr“ gerð úr pappír og njóla og þar unnu þau Björg, Ingibjörg og Magnús sigur. Stjórn foreldrafélagagsins kom og grillaði pylsur fyrir liðið og allir fengu að fara í sund. Yngta stigið fór heim á venjulegum tíma en 5.-10. bekkur var eftir á löngum degi til kl. 22:00. (Myndir)

Fjöruferð og fleira skemmtilegt

Siggi — Mon, 17 May 2010 11:47:52 +0000

10.-11. maí voru vordagar hérna í skólanum þar sem unnin voru þessi hefðbundnu útivorstörf: tiltekt, gróðursetning, hreinsa blómabeð ofl. Nokkrir úr elsta stigun tóku t.d. til í gróðurhúsinu og endurplöstuðu það svo nú verður hægt að nýta það til ræktunar næsta vetur.

Mánudaginn 10. maí var farið með yngstudeildina og elstu krakkana af leikskólanum í fjöruferð. Að vanda var farið í Skógarnesfjöru og er óhætt að segja að allir hafi skemmt sér vel við að sulla í sjónum eða leita af dýrum og búa eitthvað til í sandinum. Eitthvað var um það að nemendur blotnuðu örlítið í fæturna.

Eftir hádegi var síðan farið með allan leikskólann í sund og voru foreldrar og stelpur úr efsta stiginu fengnar til að aðstoða með krakkana. Var það auðvitað mikið fjör í ýmsum leikjum hjá Ödda og svo auðvitað bara að busla enda veðrið alveg frábært.

Á þriðjudeginum var svo hátíðarmatur hjá Áslaugu og var setið óvenju lengi að borðum þennan dag enda kræsingar miklar og glæsilegar. (Myndir)

Danssýning og tónlistardagur

Siggi — Mon, 03 May 2010 14:05:08 +0000

Fimmtudaginn 29. apríl var tvöföld uppskeruhátíð hérna í skólanum.

Fyrst var hin árlega danssýning í lok danskennslu hjá henni Ásrúnu. Fór hún fram í íþróttahúsinu og komu þar allir nemendur fram, frá leikskóla og upp í 10. bekk, og sýndu hvað þau hefðu verið að læra. Voru áhorfendur mjög ánægðir að vanda.

Þá var haldið upp í skóla og nú tók Steinunn við og léku nemendur á hljóðfæri og sungu fyrir gesti við góðar undirtektir gesta. Að sýningum loknum var foreldrafélagið með kaffi- og vöfflusölu í þágu nemenda. (Myndir)

Óvæntur gestur, tónlist og dans

Siggi — Tue, 27 Apr 2010 18:42:09 +0000

Í dag birtist óvæntur gestur á skólasvæðinu. Um var að ræða sel sem synt hafði upp Haffjarðará á morgunflóðinu og orðið eftir. Var hann eitthvað lasburða þegar hann var skoðaður nánar en hvæsti ef einhver nálgaðist of mikið. Eitthvað hresstist „Snorri“ yfir daginn því þegar falla fór að seinni partinn tókst honum að bægslast út í á og eflaust niður í sjó. (Myndir)

Viljum minna alla sem áhuga hafa á dansi og tónlist á skemmtunina í skólanum fimmtudaginn 29. apríl kl. 13:00 en þá verður danssýning í íþróttahúsinu og síðan tónlistardagur Steinunnar upp í skóla. Allir velkomnir.

Annasamur apríl.

Halla Guðmundsdóttir — Mon, 19 Apr 2010 08:21:15 +0000

Það hefur svo sannarlega verið mikið um að vera það sem af er apríl.

Fyrir páska var byrjað að vinna við útgáfu skólablaðsins okkar. Stjáni fór með nemendum í Borgarnes að safna auglýsingum og bændur vítt og breitt á svæðinu heimsóttir og teknir í viðtal. Gunnar Bender kom svo í síðustu viku og hann og Siggi unnu við uppsetningu og fleira. Blaðið er farið frá okkur í prentun og kemur vonandi út sem fyrst.

Danskennslan er byrjuð og verður á þriðjudögum og fimmtudögum. Henni lýkur svo með danssýningu þ. 29. apríl, en þá verður líka tónlistardagur Steinunnar.

Úrslitin í Stærðfræðikeppninni sem haldin var á Akranesi 10. mars, voru kynnt laugardaginn 10. apríl. Perla var í 4.-10. sæti í sínum árgangi, Flott hjá henni.

Svo styttist óðfluga í próf og vordaga, bæði í skóla og heima.

Að loknu páskaleyfi

Siggi — Fri, 09 Apr 2010 10:46:36 +0000

Að þessu sinni byrjar apríl í páskaleyfi og við vonum að allir hafi notið páskanna. Mars var viðburðarríkur mánuður, með árshátíð sem tókst mjög vel og við vonum að allir hafi skemmt sér vel. Nú styttist skólaárið og tíminn líður ansi hratt og því er mikilvægt að nemendur nýti nú þennan stutta tíma eins vel og hægt er til náms.