Laugargerðisskóli

Þann 18. mars sl. var farið með 8. -10. bekk á höfuðborgarsvæðið til að taka þátt í Skólahreysti.

Til að nýta ferðina var ákveðið að byrja á að skoða Borgarholtsskóla. Þar tók á móti okkur Óttar námsráðgjafi sem gekk með hópinn um skólann. Þar sem börnin okkar höfðu mestan áhuga á verknáminu var byrjað að skoða allt sem viðkemur bifvélum. Þar var margt fróðlegt að sjá og virtust flestir áhugasamir. Síðan var farið um listdeildina og spjallað við nemendur sem voru að vinna að lokaverkefni við myndbandagerð. Að endingu tókum við smá rúnt um bókasafnið.

Að þessari heimsókn lokinni var farið í Smárann en þar áttu keppendur að vera mættir klukkustund fyrir keppni. Hinir fóru í smáleiðangur í Smáralind á meðan. Keppnin hófst síðan kl. 13:00 og voru þarna keppendur frá 11 skólum á vesturlandi og 4 frá vestfjörðum. Það er óhætt að segja að töluvert stuð var á pöllunum á meðan keppni stóð og  að flestir hafi skemmt sér vel. Keppendurnir stóðu sig vel miðað við að þetta var í fyrsta sinn og vonandi verður framhald á.

Eftir keppni var farið með allan hópinn í Smáralind þar sem við nærðumst og síðan var haldið á kvikmyndasýningu. Held að allir hafi farið ánægðir heim að kvöldi.  (Myndir)

Miðvikudaginn 10. mars fóru allir nemendur í 8. – 10. bekk á Akranes og tóku þátt í stærðfræðikeppni í FVA. Ferðin var einnig notuð til að skoða sig um í skólanum. Ólafur námsráðgjafi tók á móti hópnum og spjallaði aðeins við þau og kynnti fyrir þeim hvað væri í boði. Þá var gengið um ganga skólans og það helsta skoðað. Mest var skoað í verklega hlutanum enda margt skemmtilegt að sjá eins og þó nokkrir fyrrum nemendur Laugargerðisskóla sem við rákumst á.

Eftir keppni var öllum boðið upp á pizzu og kók og síðan var haldið heim á leið og voru bara allir nokkuuð sáttir við daginn.

Árshátíðin okkar var á laugardaginn. Fluttir voru þættir úr söngleiknum Vælukjói eða Cry-Baby. Krakkarnir stóðu sig frábærlega og sjaldan  fengið jafn mikið hrós eins og að lokinni sýningunni. Allir nemendur skólans tóku þátt, sumir í fleiri en einu hlutverki. Eftir sýningu var svo veglegt kökuhlaðborð en nemendur 7.-10. bekkjar sjá um veitingar að mestu leyti. (Myndir)

Nú líður senn að árshátíð skólans en hún verður laugardaginn 6. mars kl. 14:00. Sýnd verða atriði úr söngleiknum Vælkjói. Undirbúningur er nú á fullu og hefur allt gengið vonum framar enda nemendur orðnir ansi sjóaðir í þessari vinnu. Myndir frá undirbúningsvinnu má sjá hér.

Sú hefð hefur skapast hér á öskudaginn að eftir hádegi er kenndur einn tími og síðan fara krakkarnir og klæða sig upp. Þegar allir eru komnir í búning hefst hefðbundin gleði. Fyrst er byrjað á smá marseringu til að hita mannskapinn upp og síðan er kötturinn sleginn úr tunnunni. Tunnukóngur í ár var Eyvindur Enok úr leikskólanum. Eftir tunnubarsmíðar fengu allir sælgæti og gátu spjallað í smá tíma og síðan farið heim á venjulegum tíma. (Myndir)

Þriðjudaginn 16. febrúar fóru nemendur í 4. og 5. bekk til Reykjavíkur að sjá leikritið Bláa gullið. Ferðin var í boði Orkuveitunnar og nemendum að kostnaðarlausu. Öddi keyrði í Borgarnes og þar söfnuðust nemendur úr skólum á Vesturlandi í rútu.Bláa gullið er um vatnið og gildi þess, nýtingu og fleira. Krökkunum fannst þetta mjög skemmtilegt en 5. bekkingarnir sögðust nú hafa vitað allt um vatnið. Þau höfðu líka verið að vinna með hringrás vatnsins fyrir jól og m.a. málað flotta skýringarmynd á einn vegginn á flísaganginum.

Sl. föstudag var dagur stærðfræðinnar. Við frestuðum honum til miðvikudags svo allir nemendur gætu tekið þátt í hinni árvissu og æsispennandi skutlukeppni. Í tilefni dagsins var stærðfræðikennsla mið og elstastigs brotin upp og nemendur unnu við að gera svokölluð hugtakakort. Einnig voru ýmis stærðfræðispil og þrautir dregin fram. Í lok dags var svo skundað í íþróttahúsið. Allir nemendur höfðu gert skutlur af ýmsum stærðum, og kom í ljós að hér skipti stærðin máli. Þeir sem áttu lengstu köstin voru Axel 9. bekk með 13,60 m    Tumi 5. bekk 16,60 m og átti hann jafnframt lengsta kastið. Inga Dóra 4.bekk var svo með lengsta kastið hjá yngsta stiginu, 8,20 m. Þeir Jón Haukur og Eyvindur Enok leiksskóladrengir, slógu svo mörgum eldri við með köst upp á 6,30 m og 5,90 m. (Myndir)

Allir nemendur Laugargerðisskóla fóru í heimsókn í Menntaskólann í Borgarfirði. Tilgangurinn með heimsókninni var að hlusta á fyrirlestur um stjörnufræði í stjörnuskoðunarkúlu.

Kúlunni / tjaldinu var komið fyrir í hátíðarsal Menntaskólans og það skriðu nemendur inn og lögðust á bakið , horfðu upp í himinhvolfið, eða mynd af því sem varpað  var upp í hvelfingu kúlutjaldsins.

Nemendur fræddust um stjörnumerki, reikistjörnu og fastastjörnur, og sólkerfið.

Þetta var ánæguleg og fræðandi heimsókn, og tíminn var fljótur að líða, að heimsókn lokinni voru nemendur keyrðir heim.

Þann 1. febrúar var undirritaður samningur milli Eyja- og Miklaholtshrepps og Borgarbyggðar um slit á byggðasamlagi um Laugargerðisskóla. Jafnframt var undirritaður þjónustusamningur til fimm ára, milli sveitarfélaganna um að þeir nemendur úr Borgarbyggð sem búsettir eru í Kolbeinsstaðahreppi geti áfram stundað nám í Laugargerðisskóla.

Eyja- og Miklaholtshreppur hefur því alfarið tekið við rekstri skólans en Borgarbyggð mun kaupa þjónustu Laugargerðisskóla fyrir börn úr Kolbeinsstaðahreppi.